الصحفي صالح الجعفراوي نجا من قصف إسرائيلي وقتل برصاص مليشيات فلسطينية
🔴 اللي قدامك ده صحفي فلسطيني اسمه صالح الجعفراوي،
استشهد من شوية أثناء تغطيته للي بيحصل ف القطاع.. بس المرة دي، اللي قتله مش طيارة إسراعيلية… ولا قناص من جيش الكيان… اللي قتله كان فلسطيني زيه ومن بني جلدته، ومن جوه غز ة نفسها…
🟢 صالح لو انت متعرفوش، كان من أكتر الصحفيين تأثيرًا خلال السنتين اللي فاتوا… كاميرته كانت بتنقل للعالم كله شكل الحياة جوه الدمار اللي اتسبب فيه جيش الاحتلال، وصوته كان صوت كل الفلسطينيين من وسط الركام والموت والدم، وكان قادر لوحده يكسر الرواية الإسرائيلية اللي كانت بتحاول تزيف التاريخ وتفهم الشعوب انهم الجيش الأكثر اخلاقية في العالم…
صالح بكاميرته البسيطة وموبايله، قدر يعري آلة الدعاية الصهيونية قدام ملايين الناس، لدرجة إن الإعلام العبري نفسه قال عليه “خطر” ولازم يتم اسكاته، وجيش الاحتلال كان حاطط اسمه على القائمة الحمراء للاغتيالات من فترة…
🟡 بس المفارقة إن الرصاص اللي يحصد روحه ما يجيش من الاحتلال… بل ييجي بعد ايقاف الحرب، من بنادق مسلحين خونة من جوه الحي اللي اتولد فيه، ونفس الشوارع اللي كان بيصورها…
🟣 حسب الروايات وشهود العيان من القطاع والصحافة، فاللي حصل بالضبط هو ان صالح كان في حي الصبرة جنوب مدينة غزة، بيغطي حجم الدمار الناتج من الحرب بعد انتهاءها وبدء تنفيذ الهدنة…
بس فجأة وحسب شهادة أهله، تم فقد الاتصال بيه النهارده الصبح واختفى لساعات، قبل ما يظهر فجأة جثمانه وهو مصاب ب 7 طلقات في أماكن متفرقة من جسده…
⚫️ بحسب التقارير الصحفية، فاللي قتله كان مجموعة مسلحة من ضمن الميليشيات المتعاونة مع الاحتلال والتابعة لعشائر معينة كانت بتساعد الجيش الاسرائيلي بالمعلومات والسلاح أثناء الحرب، ودلوقتي بيشنوا حرب شعواء على فصائل المقاومة اللي بتحاول اصطيادهم والقضاء عليهم لتأمين القطاع..
🔹️ والناس دول هما اللي خطفوه أثناء عمله وعذبوه، وبعدين ضربوه بالنار وسرقوا معداته، وسابوه ملقى على قارعة الطريق…
🔸️ صالح كان عنده جملة مشهورة أوي دايمًا بيقولها، هي “لا أخشى الموت وسأظل شوكة في ظهرهم”… يقصد الاحتلال طبعًا… لكنه مكانش متوقع أبدًا انه ينجو من الحرب على القطاع، ونهايته تكون على يد الخونة وليس الاحتلال نفسه…
🟢 وعشان كده، وبعد تأمل؛ ربما الآن -بشكلٍ ما- يكون رسالته الأخيرة اللي تركها رحيله، هي الرسالة الأهم والأسمى في تاريخه المشرف… رسالة بتقول إن الخطر الحقيقي مش مجرد الاحتلال… فهو العدو الأزلى المعروف والسافر للقاصي والداني، والكل يراه ويؤمن بإنه لا عهد له ولا ذمة…
🔵 الخطر الحقيقي هو للأسف المنافقين والخونة من اتباع الاحتلال، اللي اسمهم على أسمك ولغتهم ولهجتهم زيك، ووجوههم وبشرتهم نفس بشرتك، لكن في قلوبهم النفاق والخسة والخيانة…
إنا لله وإنا إليه راجعون، ربنا يرحمه ويسكنه فسيح جناته…
